चुनावी सम्भाषणको एक चुट्कीमा ……
श्रावन १३ सल्यान
गाउँ सरकार !
बन्नु अघि
सिंह गर्जिए झैं
चुनावी सम्भाषणको
एक चुट्कीमा
बर्षौंदेखि अँध्यारो
मेरो गाउँ
बिजुलीले झलमल्ल भयो ।। १ ।।
चालीस नपुग्दै
दिवंगत भएका
पतिको सुर्ताले
शोकको गर्तबाट
सांसारिक जीवनमा
फर्किन नसकेकी
भदी कुमालका
गर्जका सुस्केराहरू
चुनावी सम्भाषणको
एक चुट्कीमा
खुशीले फेरियो ।। २ ।।
गाबिस छँदै
योजना तर्जुबाट
धेरैपटक पास भएर
कार्यान्वयन नभएको
तल्लो झिनचौरको
पुरानो खानेपानी योजना
चुनावी सम्भाषणको
एक चुट्कीमा पूरा भयो ।। ३ ।।
तर ,
गाउँ सरकार बनेपछि
मेरो गाउँ सरकार
गाउँबाट हरायो
बस्तीबाट हरायो
न बिजुली बल्यो
न खानेपानी बन्यो
शोकको गर्तमा डुवेकी
भदी कुमालको
न घरको छाना फेरियो
चुनावी संभाषणमा
एक चुट्कीले
गाउँलाई बदल्ने
सिंह गर्जन
आज कता हरायो ? ।। ४ ।।
लेखकको सम्वन्धमा